تقسيم الهارد و إعداده لتثبيت اللينوكس | درس للمبتدئين

حضرتك هتسطب برنامج ال Partition Magic .. و التسطيب سهل مش محتاج شرح.
و دى واجهة البرنامج

زى ما حضراتكم شايفين الهارد كله على بعضه بتاع 20 جيجا!
حجم ال C فقط 5 جيجا و حجم ال D تقريبا 15 جيجا.

طبعا فى الواقع معظم البشر عندهم الهارد 120 جيجا و 320 و أرقام أكبر !!!!
يعنى مش هتحتاج تعدل فى بارتشن ال C ...
يعنى لو ال C حجمه فوق ال 10 جيجا يبقى ما تعملش الخطوه القادمة (تعديل حجم بارتشن)

** تعديل حجم بارتشن **
بارتشن ال C حجمه 5 جيجا و أنا هزوده إلى 8 جيجا. تابعوا:
- إضغط على Resize a partition و على النافذة الجديده إضغط على Next


هنا البرنامج بيسأل Which partition to be resized .. ال C و إضغط على Next

ملحوظه:فى حالة ما تكون مركب أكثر من هارد ، هتلاقى البرنامج بيسألك عن الهارد اللى هتشتغل عليه الأول و الا التانى و منطقيا كده ما ينفعش تاخد من هارد تحط فى التانى

قولنا للبرنامج هنعدل فى بارتشن ال C .. و هنا بيسألنى عن الحجم الجديد

هنكتب الحجم الجديد لبارتشن ال C ... كتبت 8 جيجا (يعنى هنزود الحجم)
يبقى أكيد هيسألنا هتاخد ال 3 جيجا منين ؟
ملحوظه: ال minimum size معتمد على مساحة البيانات الموجوده حاليا على البارتشن C ..
أما ال maximum size يعتمد على المساحه الفارغه Free Space على الهارد بالكامل.
و هنا بيسألنا هتاخد المساحه (3 جيجا) منين ؟ معنديش غيره .. ال D .. و نضغط على Next

و يمكنك إختيار أكثر من بارتشن.
يعنى مثلا لو عندك مساحه فارغة فى ال D و ال E و ال F يمكنك إختيارهم بالكامل.

هنا البرنامج بيوريك شكل الهارد كان إزاى و هيبقى إزاى.. و واضح إن المساحات إتغيرت.

لحد هنا إحنا لسه معملناش أى حاجه. و لو لا قدر الله الكهربا فصلت ،
ما تخافش لأنك لسه هتحتاج تعمل Confirm للتغييرات اللى عملتها.


خلاص عدلت فى البارتشن و وصلت للصورة اللى إنت عايزها. إضغط بقى على Apply


و هنا طلعت لنا رسالة بتقولك (ده آخر كلام عندك؟) .. توكل على الله و إضغط Yes


و دى صورة للبرنامج و هو بيقسم فى الهارد .. بيقطع من ال D و يضيف لل C


العمليه إنتهت

و بكده عرفنا إزاى تعدل (تزود) مساحة بارتشن
و نفس ال wizard ده ممكن نستخدمه لو عايزين نقلل مساحة بارتشن.
تابع المشاركة الثانيه ....
====================================




كده الخطوة الأولى إنتهت و فى الغالب مش هتحتاج تعملها .. لكن الشرح للعلم بالشئ
يعنى لو عندك بارتشن تانى (ال D مثلا) عليه مساحه كبيرة .. يبقى تبدأ بالخطوة القادمة

** عمل بارتشن جديد **
ده الجزء الأهم و ده اللى إحنا محتاجينه فى الغالب.
السيناريو هو إنك عندك بارتشن فيه مساحه فاضيه كبيرة و هنيجى إحنا و نعمل بارتشن جديد بقطع جزء من المساحة الفاضيه دى
طبعا الخطوة دى ممكن تعملها بإستخدام برنامج التقسيم الموجود مع إسطوانة اللينوكس .. لكن نشوفها على ال Partition Magic
فى المثال بتاعنا ، بارتشن ال D مساحته 12 جيجا ، هنقطع منه 10 جيجا
و نعمل بهم بارتشن جديد. تابعوا:

من الواجهة الرئيسية ، هنختار Create a new partition .. و نضغط على Next


هنا بيسألك عايز البارتشن الجديد فين ؟ و أنا إخترت بعد بارتشن ال D


بيسأل هتاخد المساحه منين ؟


و بعدين بيسأل عن مساحة البارتشن الجديد و نوعه و ال File System


و هنا بيورينا شكل الهارد (قبل و بعد !)

لو موافق إضغط على Finish
و برده ما تخافش لسه ما فيش أى تغيير هيحصل إلا لما تضغط على Apply

تمااام ،، كده الشكل اللى إحنا عايزينه .. نضغط بقى على Apply

و خلاص كده .. الهارد بتاعك إتقسم. و لو فتحت My computer هتلاقى البارتشن الجديد.
قبل ما نبدأ تسطيب اللينوكس هنعمل حاجه بسيطه
هنروح على Start > Run > compmgmt.msc


و من القائمة اللى فى الشمال ، نضغط على disk management

فى الخطوه دى هنحذف البارتشن الجديد يعنى هيبقى Free Space
(بمعنى أصح Unlocated) ..
تابعوا
بنعلم على البارتشن الجديد اللى عملناه ..
(ما تغلطش و تعلم على بارتشن تانى .. اللهم بلغت اللهم فاشهد!)
و بعدين نروح على Action > All Tasks > Delete Logical Drive

إنت بتحذف بارتشن .. يعنى لازم تكون مركز جدا
ما تغلطش و تعلم على بارتشن تانى غير البارتشن الجديد اللى إحنا لسه عاملينه

و دى رسالة تحذير بتقول لك إن كل البيانات اللى على البارتشن ده هتتحذف

و بكده البارتشن بقى Free Space .. كده نقدر نبدأ تسطيب اللينوكس
هنبدأ خطوات تثبيت اللينوكس عادى جدا .. و هنا مثال للأبونتو
هتمشى مع خطوات التثبيت لحد ما تيجى على خطوة تقسيم الهارد

هنختار Manual .. و نضغط على Next
هنا بقت الدنيا واضحه قدامك .. مكتوب Free Space يعنى هو ده اللى هنقسمه
علم على Free Space و بعدين إضغط على New Partition

اللينوكس عموما مش هيحتاج غير / و ال swap
ملحوظه: يفضل عمل بارتشن لل home
لكن هنا هنعمل بارتشنين فقط ال root partition .. أهوه


و نرجع تانى على المساحه الفاضيه Free Space .. و نضغط على New Partition


خصص المساحة الباقيه لل swap .. بعد كده نضغط Forward


و كده شكرا .. كمل خطوات التسطيب. و أخيرا Restart Now


و هنا شاشة ال Grub و فيها سطر لدخول الويندوز ..


ندخل كده على الويندوز ..و تقسيمات الهارد بقى شكلها عامل إزاى ..


نشوف البيانات و الملفات بتاعتنا موجوده و الا لأ ؟؟

تماااام و تم تسطيب اللينوكس مع الويندوز dual boot بنجاح ..
و بياناتى زى ما هى ما فيش هارد إتفرمت و لا ملفات ضاعت
عارف إن حضرتك هتقول إن تقسيم الهارد ممكن تعمله أثناء تثبيت اللينوكس.
لكن .. إقرأ المشاركة الثالثة ..

===============================================




ده شكل الماندريفا و إنت بتسطبها و لما بتيجى لخطوة التقسيم بيبقى على الشكل ده


و هنا مثلا مثال آخر لو جيت تسطب سيرفر ديبيان فى ال console mode



طبعا واضح إن الشكل بيختلف من توزيعه لأخرى
يعنى لو إنت محترف أو عندك خبرة باللينوكس أكيد الموضوع هيبقى سهل معاك
لكن لو مبتدأ .. فمن الأفضل إنك تجهز الهارد و إنت لسه على الويندوز
لما تيجى تسطب اللينوكس ، هتختار ال manual mode و تقسم فى الجزء اللى هو Free Space زى ما إنت عايز بدون خوف من ضياع ملفاتك و لا فرمتة جزء من الهارد.
أرجو إن الموضوع يكون واضح